გადაზიდვის პირობები

მუხლი 1. შესავალი

1. ჩვენი ავიაკომპანიის მიერ განხორციელებული რეისის ბილეთის შეძენით, თქვენ ჩვენთან დებთ გადაყვანის ხელშეკრულებას.ეს ხელშეკრულება რეგულირდება:
   (1) თქვენს მარშრუტის ქვითარში მითითებული პირობებით;
   (2) შესაბამისი ტარიფების დოკუმენტით;
   (3) გადაყვანის წინამდებარე ზოგადი პირობებით; და
   (4) ნებისმიერი სხვა წესითა და რეგულაციით, რომელიც შეიძლება დროდადრო გამოქვეყნდეს ჩვენი ავიაკომპანიის მიერ.
2. გადაყვანის წინამდებარე ზოგადი პირობები (შემდგომში „პირობები“) ვრცელდება თქვენს ჯავშნაზე სს უანქლიქ ეარვეიზთან, რომელიც არის საქართველოში რეგისტრირებული სააქციო საზოგადოება, იურიდიული მისამართით: ამაღლება III შესახვევი 2, მე-7 სართული, ბინა 25, მთაწმინდის რაიონი, თბილისი, საქართველო. თქვენს ჯავშანზე ასევე ვრცელდება ქვემოთ ჩამოთვლილი დოკუმენტები, რომლებიც შესაბამისი მითითების გზით წარმოადგენს წინამდებარე პირობების შემადგენელ ნაწილს:
1. ჩვენი ვებგვერდის გამოყენების პირობებს — იმ შემთხვევაში, თუ თქვენ იყენებთ ჩვენს ვებგვერდს;
2. თქვენი ჯავშნის დადასტურებას და მასში მოცემულ ნებისმიერ განსაკუთრებულ პირობას.
   
   გთხოვთ, ყურადღებით წაიკითხოთ ეს პირობები ფრენის დაჯავშნამდე და დარწმუნდით, რომ სრულად გესმით ისინი.ჩვენ შესაძლოა დროდადრო განვაახლოთ ეს პირობები, ამიტომ თქვენ უნდა გადაამოწმოთ ისინი ყოველი ჯავშნის წინ, რადგან გადაყვანის ხელშეკრულება დადებულად ითვლება თქვენ მიერ ბილეთის სრული ტარიფის გადახდისა და ჩვენ მიერ მარშრუტის ქვითრის გაცემის მომენტიდან.
3. ამ დოკუმენტში გამოყენებულ გარკვეულ ტერმინებსა და განსაზღვრებებს აქვს განსაკუთრებული მნიშვნელობა, რომელიც უნიკალურია ამ დოკუმენტისთვის და შესაძლოა განსხვავდებოდეს სხვა ავიაკომპანიების მიერ გამოყენებული მნიშვნელობებისგან. იმ შემთხვევაში, თუ ამ პირობებში გარკვეული სიტყვები და ფრაზები დიდი ასოებით არის აღნიშნული, მათ აქვთ ქვემოთ, მე-2 პუნქტში მოცემული განსაზღვრებები.
4. ამ წესებსა და პირობებში, როდესაც ვახსენებთ უანქლიქ ეარვეიზს ან ვიყენებთ სიტყვებს „ჩვენ“, „ჩვენი“ და მათ წარმოებულებს, ვგულისხმობთ სს "უანქლიქ ეარვეიზს", ხოლო როცა ვიყენებთ სიტყვებს „თქვენ“, „თქვენი“ და მათ წარმოებულებს, ვგულისხმობთ თქვენ, როგორც მგზავრს ან ჯავშანში მითითებულ პირს.
5. ეს წესები და პირობები არეგულირებს სს უანქლიქ ეარვეიზსა და მგზავრებს შორის სახელშეკრულებო ურთიერთობას და მიზნად ისახავს მგზავრებისა და მათი ბარგის უსაფრთხო, ეფექტური და სამართლიანი ტრანსპორტირების უზრუნველყოფას. ისინი ვრცელდება სს უანქლიქ ეარვეიზის მიერ მოწოდებულ ყველა სატრანსპორტო მომსახურებაზე, საქართველოს კანონმდებლობისა და მოქმედი საერთაშორისო კონვენციების დებულებების შესაბამისად. წინამდებარე წესებსა და საქართველოს კანონმდებლობისა და მოქმედი საერთაშორისო კონვენციების დებულებების შორის ნებისმიერი წინააღმდეგობის შემთხვევაში უპირატესობა ენიჭება საქართველოს კანონმდებლობისა და შესაბამისი საერთაშორისო კონვენციების დებულებებს.

მუხლი 2. განმარტებები

1. „თანმხლები ზრდასრული“ — არის არანაკლებ თვრამეტი (18) წლის პირი, რომელიც მგზავრობს არასრულწლოვანთან ერთად და რეგისტრირებულია იგივე ჯავშანში.
2. „მოქმედი კანონმდებლობა“ — ნიშნავს საქართველოს ყველა კანონს და კანონქვემდებარე აქტს რომელიც ვრცელდება თქვენს ჯავშანსა და მოგზაურობაზე, მათ შორის, შესაბამის შემთხვევაში, მოქმედ საერთაშორისო კონვენციას.
3. „ბარგი“ — ნიშნავს თქვენს პირად ნივთებს, რომელიც თან ახლავს თქვენს მოგზაურობას, მათ შორის რეგისტრირებულ ბარგს, ხელბარგს (არარეგისტრირებულ ბარგს), ბორტზე არსებულ ზედმეტ ბარგს და პირად ნივთებს, გარდა იმ ნივთებისა, რომელთა გადატანა აკრძალულია ამ პირობების შესაბამისად.
4. „ჯავშანი“ — არის სს უანქლიქ ეარვეიზის ერთი ან მეტი რეისის ჯავშანი, რომელიც დადასტურებულია ჩვენს მიერ.
5. „ბარგის საიდენტიფიკაციო საჭდი“ — ნიშნავს თქვენს ბარგზე მიმაგრებულ დოკუმენტს, რომელიც გაიცემა მხოლოდ თქვენი შემოწმებული ბარგის იდენტიფიკაციისთვის.
6. „ბარგის საიდენტიფიკაციო ქვითარი“ — ნიშნავს დოკუმენტს, რომელიც გაიცემა მხოლოდ თქვენი შემოწმებული ბარგის იდენტიფიკაციისთვის და მიმაგრებულია თქვენს ჩასხდომის ბარათზე.
7. „ჯავშნის განმახორციელებელი პირი“ — ნიშნავს სრულწლოვან და სრულუფლებიან ფიზიკურ პირს ან იურიდიულ პირს, რომელიც მოქმედებს როგორც მგზავრის აგენტი და ახორციელებს ჯავშანს საკუთარი სახელით და/ან სხვა მგზავრების სახელით. ეს ტერმინი ასევე გულისხმობს ნებისმიერ ფიზიკურ ან იურიდიულ პირს, რომელიც იხდის მგზავრის მარშრუტში მითითებულ სრულ ტარიფს, მათ შორის ტურისტულ სააგენტოებს.
8. „ჩასხდომის ბარათი“ — ნიშნავს დოკუმენტს, რომელიც (i) გაიცემა რეგისტრაციის დახლზე და შეიცავს თქვენი ჯავშნის საცნობარო ნომერს ან მარშრუტის ქვითარს და მოქმედ სამგზავრო დოკუმენტებს; ან (ii) დაბეჭდილია, გადმოწერილია ან ნაჩვენებია თქვენს მობილურ მოწყობილობაზე (Passbook-ში ან სხვა მსგავს აპლიკაციაში) ონლაინ ან მობილური რეგისტრაციის დასრულების შემდეგ და გაძლევთ თვითმფრინავში ასვლის უფლებას.
9. „ხელბარგი“ — ნიშნავს თქვენს ბარგს, რომლის თვითმფრინავში ატანაც შეგიძლიათ ამ წესებისა და პირობების შესაბამისად.
10. „მომხმარებელთა მომსახურება“ — ნიშნავს ჩვენს მომხმარებელთა მომსახურების სატელეფონო ხაზს, რომლის მიმდინარე ნომრები მითითებულია ჩვენს ვებგვერდზე.
11. „გაუქმების საფასური“ — ნიშნავს 6.4.1 პუნქტის შესაბამისად ჯავშნის გაუქმების შემთხვევაში ხელშეკრულების დადების მომენტისთვის ჩვენს ვებგვერდზე მითითებული ოდენობით თქვენ მიერ გადასახდელ თანხას.
12. „გადამზიდავი“ — ნიშნავს ავიაგადამზიდველს, რომელმაც გასცა ბილეთი, ასევე ყველა ავიაგადამზიდველს, რომელიც ასრულებს ან იღებს ვალდებულებას მგზავრის და/ან მისი ბარგის გადაყვანის შესახებ ამ შეთანხმების შესაბამისად.
13. „შემოწმებული ბარგი“ — ნიშნავს ბარგს, რომელსაც ჩვენ ვიღებთ ჩვენს მფლობელობაში და რომელსაც ვურთავთ ბარგის საიდენტიფიკაციო საჭდს.
14. „კონვენცია“ — ნიშნავს, შესაბამის შემთხვევაში: (ა) მონრეალის კონვენციას საერთაშორისო საჰაერო გადაზიდვებთან დაკავშირებული გარკვეული წესების გაერთიანების შესახებ, რომელიც ხელმოწერილია მონრეალში 1999 წლის 28 მაისს; ან (ბ) თუ მონრეალის კონვენცია კანონის ძალით არ ვრცელდება თქვენს გადაყვანაზე, ნებისმიერ სხვა კონვენციას, ხელშეკრულებას ან კანონს, რომელიც ვრცელდება თქვენს გადაყვანაზე და სავალდებულოა სს უანქლიქ ეარვეიზისთვის.
15. „ხელშეკრულება“ — თქვენსა და სს უანქლიქ ეარვეიზს შორის დადებული ხელშეკრულება მგზავრებისა და ბარგის საჰაერო გადაყვანის შესახებ.
16. „ტარიფი“ — საჰაერო გადაყვანის ფასი გამგზავრების წერტილიდან დანიშნულების ადგილამდე, სხვა მომსახურების საფასურის გამოკლებით.
17. „სხვა მომსახურების საფასური“ / „მომსახურების საფასური“ — საჰაერო გადაყვანასთან დაკავშირებული დამატებითი მომსახურების საფასური, როგორც ეს მითითებულია ჩვენს ვებგვერდზე.
18. „გადაყვანის ზოგადი პირობები“ — სს უანქლიქ ეარვეიზის მიერ მგზავრებისა და ბარგის საჰაერო გადაყვანის დებულებები, როგორც ეს მითითებულია გადაყვანის ამ ზოგად პირობებში, ასევე მოხსენიებული, როგორც „პირობები“.
19. „ჩვილი“ — მგზავრი, რომლის ასაკი მგზავრობის თარიღისთვის ერთი დღიდან ორ წლამდეა.
20. „მარშრუტის ქვითარი“ — დოკუმენტი, რომელიც გაიცემა ტარიფის სრული გადახდის შემდეგ, შეიცავს თქვენი ჯავშნის დეტალებს და წარმოადგენს ხელშეკრულების ნაწილს.
21. „მცირეწლოვანი“ — მგზავრი, რომელსაც მგზავრობის მომენტისთვის 14 წლის ასაკისთვის არ მიუღწევია, მათ შორის „ჩვილი“ (1 დღიდან 2 წლამდე) და „ბავშვი“ (2 წლიდან 14 წლამდე).
22. „უანქლიქ ეარვეიზი“, „ჩვენ“ ან „ჩვენი“ — ნიშნავს სს უანქლიქ ეარვეიზს.
23. „დამატებითი მომსახურება“ — ჩვენი ან მესამე მხარის მიერ გაწეული მომსახურება საჰაერო ტრანსპორტირებასთან დაკავშირებით, როგორც ეს მითითებულია ჩვენს ვებგვერდზე.
24. „მგზავრი“ — ჯავშნის საფუძველზე თვითმფრინავით გადასაყვანი/გადაყვანილი ნებისმიერი პირი, ეკიპაჟის წევრების გარდა.
25. „შეზღუდული მობილურობის მქონე ან სპეციალური დახმარების საჭიროების მქონე მგზავრი (PRM)“ — მგზავრი, რომლის მობილობა შეზღუდულია ფიზიკური შეზღუდვის, ასაკის ან ავადმყოფობის გამო და რომლის მდგომარეობაც საჭიროებს სპეციალურ დახმარებას.
26. „პირადი საკუთრება“ — 8.4 მუხლში ჩამოთვლილი მცირე ზომის ნივთები, რომელთა თან წაღებაც შეგიძლიათ ბორტზე თქვენი ხელბარგის გარდა.
27. „SDR“ — საერთაშორისო სავალუტო ფონდის მიერ განსაზღვრული სპეციალური ნასესხები უფლებები.
28. „ტარიფები“ — ჩვენს ვებგვერდზე გამოქვეყნებული ტარიფები, გადასახადები და გადაზიდვის შესაბამისი პირობები.
29. „სრული ტარიფი“ — ჩვენს მიერ მოწოდებული ყველა მომსახურების სრული ფასი, მათ შორის გადაზიდვის ღირებულება და დამატებითი მომსახურების გადასახადები.
30. „სამგზავრო დოკუმენტები“ — პასპორტები, ვიზები, ჯანმრთელობის ცნობები და სხვა დოკუმენტები, რომლებიც კანონით არის განსაზღვრული ქვეყანაში შესვლის ან გასვლისთვის.
31. „ვებგვერდი“ — ავიაკომპანიის ოფიციალური ვებგვერდი https://oneclick.aero/

მუხლი 3. მოქმედების სფერო და სამართლის არჩევანი

1. ეს წესები და პირობები ვრცელდება მგზავრებისა და ბარგის ყველა გადაყვანაზე, რომელსაც ახორციელებს სს უანქლიქ ეარვეიზი, გარდა იმ შემთხვევებისა, როდესაც კონვენცია ან სავალდებულო მოქმედი კანონმდებლობა სხვაგვარად ითვალისწინებს. ეს წესები და პირობები ვრცელდება ნებისმიერ რეისზე, რომელიც მითითებულია მარშრუტის ქვითარში, როგორც სს უანქლიქ ეარვეიზის, როგორც გადამზიდავის მიერ შესრულებული, ასევე ნებისმიერ რეისზე, რომელსაც სხვაგვარად ახორციელებს სს უანქლიქ ეარვეიზი.
2. გადაზიდვის ხელშეკრულება და ეს წესები და პირობები რეგულირდება და განიმარტება საქართველოს კანონმდებლობის შესაბამისად.
3. ხელშეკრულებიდან ან მასთან დაკავშირებით წარმოშობილი ნებისმიერი დავა გადაწყდება მოსარჩელის საცხოვრებელი ადგილის კომპეტენტური სასამართლოს მიერ.
4. ჩვენ მიერ სხვა გადამზიდავების სახელით შესრულებული ფრენები:
   1. გადაზიდვის ეს ზოგადი პირობები ვრცელდება ნებისმიერ რეისზე ან ფრენის სეგმენტზე, რომელსაც ახორციელებს სს უანქლიქ ეარვეიზი, როგორც ოპერირებადი გადამზიდავი, მაშინაც კი, თუ რეისი რეკლამირებულია ან იყიდება სხვა ავიაკომპანიის (შემდგომში „კონტრაქტორი გადამზიდავი“) კოდით, სავაჭრო სახელწოდებით ან ბრენდით.
   2. ასეთ შემთხვევებში, თუ თქვენ გაქვთ გადაზიდვის ხელშეკრულება კონტრაქტორ გადამზიდავთან, თქვენი და თქვენი ბარგის სს უანქლიქ ეარვეიზის მიერ გადაზიდვა რეგულირდება:
      (ა) გადაზიდვის ამ ზოგადი პირობებით; და
      (ბ) კონტრაქტორი გადამზიდავის გადაზიდვის პირობებით, იმ შემთხვევაში, თუ ისინი არ ეწინააღმდეგება გადაზიდვის ამ ზოგად პირობებს.
   3. ეჭვის თავიდან ასაცილებლად, თუ სს უანქლიქ ეარვეიზი არის ოპერაციული გადამზიდავი, ჩვენი პასუხისმგებლობის დებულებები (მუხლი 11), ბარგის წესები (მუხლი 8), ქცევის წესები (მუხლი 10), პრეტენზიების პროცედურები (მუხლი 12) და ფაქტობრივი გადაზიდვის მარეგულირებელი ყველა სხვა პირობა და წესი გამოიყენება და უპირატესობა ენიჭება კონტრაქტორი გადამზიდავის ნებისმიერ წინააღმდეგობრივ პირობებს.
   4. თქვენი რეისის ფაქტობრივი ოპერატორის დასახელება გეცნობებათ კანონმდებლობის დაცვით - მიეთითება ჯავშანში, მარშრუტის ქვითარში ან/და გეცნობებათ უშუალოდ აეროპორტში.

მუხლი 4. დაჯავშნა

1. ჯავშნის განხორციელება შესაძლებელია უშუალოდ ჩვენი ვებგვერდის მეშვეობით.
2. ჯავშანი ჩაითვლება დადასტურებულად მხოლოდ სრული ტარიფის სრულად გადახდისა და ჩვენი მხრიდან მარშრუტის ქვითრის გაცემის შემდეგ.მარშრუტის ქვითარი (და, ბარგის არსებობის შემთხვევაში, ბარგის საიდენტიფიკაციო ქვითარი) ადასტურებს თქვენსა და ჩვენს შორის საჰაერო გადაყვანის შესახებ ხელშეკრულების დადებას; ცალკე ბილეთი არ გაიცემა.ჩვენ ვიტოვებთ უფლებას გავაუქმოთ ნებისმიერი ჯავშანი, რომელიც სრულად არ არის გადახდილი. დადასტურება და მარშრუტის ქვითარი გამოგეგზავნებათ იმ ელექტრონულ ფოსტის მისამართზე, რომელიც დაჯავშნის დასრულებისას გექნებათ მითითებული.
3. ჩვენ უზრუნველვყოფთ ტრანსპორტირებას მხოლოდ მარშრუტის ქვითარში მითითებულ პირს (პირთა ჯგუფს) და გვაქვს უფლება მოვითხოვოთ მოქმედი პირადობის დამადასტურებელი დოკუმენტი.
4. თქვენ პასუხისმგებელი ხართ მგზავრების ზუსტი სახელებისა და საკონტაქტო ინფორმაციის მიწოდებაზე. ჯავშნის განმახორციელებელი პირი ითვლება ჯავშანში მითითებული ყველა მგზავრის წარმომადგენლად და ეთანხმება ამ პირობებს მათი სახელით. გარდა ამისა, თუ ჯავშნის განმახორციელებელი პირი არ არის მგზავრი, მაგრამ მისი საკონტაქტო ინფორმაცია მითითებულია თქვენს ჯავშანში, თქვენ ეთანხმებით, რომ ეს პირი: (i) პასუხისმგებელია ჩვენგან ან ჩვენი მომსახურების მიმწოდებლებისგან ჯავშანთან დაკავშირებული ყველა შეტყობინების მიღებაზე; და (ii) თუ ჯავშნის განმახორციელებელი პირს ან მგზავრს წერილობით სხვა რამ არ შეუთანხმებია ჩვენთან, ჩვენ მივიჩნევთ, რომ ჯავშნის განმახორციელებელ პირს აქვს მგზავრისგან მიღებული მოქმედი უფლებამოსილება, მიიღოს ნებისმიერი ანაზღაურება, ასევე შესაბამის შემთხვევაში, ჯავშნის საფუძველზე გადასახდელი გაუთვალისწინებელი ხარჯები ან კომპენსაცია. ჩვენ არ ვართ პასუხისმგებელი აღნიშნული თანხის ჯავშვნის განმახორციელებელი პირის მიერ მგზავრისთვის გადახდაზე.
5. თუ თქვენ გაქვთ შეზღუდული მობილურობა და/ან გჭირდებათ სპეციალური დახმარება (მათ შორის, მაგრამ არა მხოლოდ, დამხმარე ძაღლის ტრანსპორტირება), თქვენი რეისის დაგეგმილ გამგზავრებამდე არაუგვიანეს 48 საათისა უნდა გვაცნობოთ თქვენი საჭიროებებისა და ნებისმიერი მობილურობის დამხმარე საშუალებების ან მოწყობილობების საჭიროების შესახებ, რომელთა თან წაღებაც გსურთ. ამისათვის, გთხოვთ, დაუკავშირდეთ ჩვენს მომხმარებელთა მომსახურების გუნდს ჩვენს ვებგვერდზე მითითებული სპეციალური ტელეფონის ნომრების ან ელექტრონული ფოსტის მისამართის საშუალები.
6. თქვენს ჯავშანში შეთანხმებული ნებისმიერი ცვლილება აისახება ახალ მარშრუტის ქვითარში. ამ შემთხვევაში, ახალი მარშრუტის ქვითარი წარმოადგენს გადაზიდვის ხელშეკრულებას მისი გაცემის მომენტიდან.
7. თქვენ შეგიძლიათ მოითხოვოთ თქვენი მარშრუტის ქვითრის ან ჯავშნის კოდის შეცვლა (ხელახლა გაგზავნა) ჩვენს მომხმარებელთა მომსახურების გუნდში დარეკვით. ამ სერვისისთვის შეიძლება დაგეკისროთ ადმინისტრაციული საფასურის გადახდა.
8. თუ თვლით, რომ გააკეთეთ ჯავშანი, მაგრამ არ მიგიღიათ მარშრუტი ან ჯავშნის დადასტურება, გთხოვთ, დაუკავშირდეთ ჩვენს მომხმარებელთა მომსახურების გუნდს.
9. პერსონალური მონაცემების დაცვის შესახებ ინფორმაცია და წესები ხელმისაწვდომია ჩვენს ვებგვერდზე გამოქვეყნებულ პოლიტიკის დოკუმენტში.

მუხლი 5. ტარიფები, გადასახადები და მოსაკრებლები

1. ტარიფები ვრცელდება მხოლოდ ტრანსპორტირებაზე გამგზავრების აეროპორტიდან დანიშნულების აეროპორტამდე, თუ სხვა რამ არ არის მითითებული.
2. ტარიფები არ მოიცავს სახმელეთო ტრანსპორტირების სერვისს აეროპორტებს შორის ან აეროპორტსა და ქალაქის ტერმინალებს შორის.
3. თქვენი ტარიფი გამოითვლება ჩვენი ტარიფების მიხედვით, რომელიც მოქმედებს თქვენი ბილეთის გადახდის დღეს, თქვენს მარშრუტის ქვითარზე მითითებული მოგზაურობის თარიღებისა და მარშრუტისთვის.
4. თუ თქვენ შეცვლით მარშრუტს ან მოგზაურობის თარიღებს, ამან შეიძლება გავლენა მოახდინოს გადასახდელ ტარიფზე.
5. ტარიფების გადახდა ხდება ჯავშნის გაკეთების ვალუტაში.
6. ხელისუფლების ან აეროპორტის ოპერატორის მიერ დაწესებული გადასახადები და მოსაკრებლები უნდა გადაიხადოთ თქვენ. ეს გადასახადები და მოსაკრებლები მუდმივად იცვლება და შეიძლება დაწესდეს ჯავშნის დადასტურების შემდეგაც.
7. თუ ასეთი გადასახადი ან მოსაკრებელი გაიზრდება, თქვენ ვალდებული იქნებით გადაიხადოთ სხვაობა. ანალოგიურად, თუ გადასახადი ან მოსაკრებელი შემცირდება, თქვენ უფლება გექნებათ მოითხოვოთ ზედმეტად გადახდილი თანხის დაბრუნება.

მუხლი 6. გადახდა და ვალუტა

1. ტარიფები და გადასახადები უნდა გადაიხადოთ იმ ვალუტაში, რომელიც მითითებულია ჩვენს მიერ ან ჩვენი ავტორიზებული აგენტის მიერ, გადახდის განხორციელებამდე ან მის დროს.
2. ჩვენ ვიღებთ გადახდებს მხოლოდ ჩვენს ვებგვერდზე მითითებული გადახდის მეთოდებით.
3. თუ თქვენი ბარათის გამცემი ბანკი იყენებს ვალუტის კონვერტაციის განსხვავებულ კურსს, საბოლოო თანხა შეიძლება განსხვავდებოდეს ჩვენს ვებგვერდზე მითითებული თანხისგან. ჩვენ არ ვაგებთ პასუხს ნებისმიერ დამატებით საკომისიოზე, რომელიც შეიძლება დაგიწესოთ თქვენმა ბანკმა.
4. ბილეთის საფასურის სრულად გადაუხდელობის შემთხვევაში, ჩვენ უფლებას ვიტოვებთ გავაუქმოთ ჯავშანი და უარი გითხრათ გადაყვანაზე.

მუხლი 7. რეგისტრაცია და ჩასხდომა

1. რეგისტრაციის ბოლო ვადები განსხვავებულია აეროპორტების მიხედვით. ჩვენ გირჩევთ, რომ გაეცნოთ ამ ვადებს და დაიცვათ ისინი.
2. თქვენ უნდა იყოთ ჩასხდომის გასასვლელთან (Gate) არაუგვიანეს ჩასხდომის ბარათზე მითითებული დროისა.
3. ჩვენ უფლება გვაქვს გავაუქმოთ თქვენი ჯავშანი, თუ თქვენ დროულად არ გამოცხადდებით რეგისტრაციის დახლზე ან ჩასხდომის გასასვლელთან.
4. ჩვენ არ ვართ პასუხისმგებელი თქვენს წინაშე ნებისმიერ ზარალზე ან ხარჯზე, რომელიც გამოწვეულია თქვენი მხრიდან ამ დებულებების შეუსრულებლობით.

მუხლი 8. ბარგი

1. თქვენ უფლება გაქვთ გადაიტანოთ გარკვეული რაოდენობის ბარგი უფასოდ, ჩვენი პირობებისა და შეზღუდვების შესაბამისად, რომლებიც ხელმისაწვდომია ჩვენს ვებგვერდზე.
2. უფასო ბარგის ლიმიტის გადაჭარბების შემთხვევაში, თქვენ მოგიწევთ ზედმეტი ბარგის საფასურის გადახდა.
3. აკრძალულია შემდეგი ნივთების გადატანა: (ა) ნივთები, რომლებსაც შეუძლიათ საფრთხე შეუქმნან თვითმფრინავს ან პირებს; (ბ) ნივთები, რომელთა გადატანა აკრძალულია მოქმედი კანონმდებლობით; (გ) ნივთები, რომლებიც ჩვენი აზრით უვარგისია გადასატანად მათი წონის, ზომის, ფორმის ან ხასიათის გამო.
4. თქვენ არ უნდა შეიტანოთ თქვენს რეგისტრირებულ ბარგში: ფული, ძვირფასეულობა, კომპიუტერები, საბუთები, პასპორტები და სხვა იდენტიფიკაციის საბუთები.
5. ჩვენ უფლება გვაქვს უარი ვთქვათ იმ ბარგის გადატანაზე, რომელიც არ შეესაბამება ამ მოთხოვნებს.

მუხლი 9. განრიგი, შეფერხებები და გაუქმება

1. ფრენის დროები, რომლებიც მითითებულია განრიგში, შეიძლება შეიცვალოს. ჩვენ ყველაფერს გავაკეთებთ იმისათვის, რომ თავიდან ავიცილოთ თქვენი და თქვენი ბარგის გადაყვანის შეფერხება.
2. თუ ჩვენ გავაუქმებთ რეისს ან ვერ შევასრულებთ მას გონივრულად ახლოს განრიგთან, ჩვენი არჩევანით: (ა) გადაგიყვანთ სხვა რეისით; ან (ბ) დაგიბრუნებთ ბილეთის საფასურს.
3. თუ რეისის გაუქმება ან დაგვიანება გამოწვეულია საგანგებო გარემოებებით (ფორს-მაჟორი), ჩვენ არ ვართ ვალდებული გადავიხადოთ კომპენსაცია, გარდა მოქმედი კანონმდებლობით გათვალისწინებული შემთხვევებისა.

მუხლი 10. ქცევა ბორტზე

1. თუ თქვენი ქცევა თვითმფრინავში საფრთხეს უქმნის თვითმფრინავს, პირებს ან ქონებას, ან ხელს უშლის ეკიპაჟს მოვალეობის შესრულებაში, ჩვენ შეიძლება მივიღოთ ზომები ამ ქცევის აღსაკვეთად, მათ შორის იძულებითი ზომები.
2. თქვენ შეიძლება ჩამოგსვან თვითმფრინავიდან და უარი გეთქვათ შემდგომ გადაყვანაზე ნებისმიერ წერტილში, და შეიძლება დაგეკისროთ პასუხისმგებლობა ჩადენილი სამართალდარღვევისთვის.
3. ელექტრონული მოწყობილობების გამოყენება ბორტზე დასაშვებია მხოლოდ ეკიპაჟის ნებართვით.

მუხლი 11. პასუხისმგებლობა ზიანზე

1. ჩვენი პასუხისმგებლობა რეგულირდება მონრეალის კონვენციით და საქართველოს მოქმედი კანონმდებლობით.
2. ჩვენი პასუხისმგებლობა შეზღუდულია ზიანის ოდენობით, რომელიც დადასტურებულია დოკუმენტურად. ჩვენ არ ვართ პასუხისმგებელი არაპირდაპირ ან შედეგობრივ ზიანზე.
3. მგზავრის გარდაცვალების ან სხეულის დაზიანების შემთხვევაში, ჩვენი პასუხისმგებლობა განისაზღვრება კონვენციის წესებით.
4. ბარგის დაზიანების, დაკარგვის ან დაგვიანების შემთხვევაში, ჩვენი პასუხისმგებლობა შეზღუდულია 1 288 SDR-ით თითოეულ მგზავრზე, გარდა იმ შემთხვევებისა, როდესაც გამოცხადებულია ღირებულების დეკლარაცია და გადახდილია დამატებითი მოსაკრებელი.

მუხლი 12. პრეტენზიები და სარჩელები

1. ბარგის დაზიანების შემთხვევაში, პრეტენზია უნდა წარედგინოს გადამზიდავს დაუყოვნებლივ, ზიანის აღმოჩენისთანავე, და არაუგვიანეს 7 დღისა ბარგის მიღებიდან.
2. ბარგის დაგვიანების შემთხვევაში, პრეტენზია უნდა წარედგინოს არაუგვიანეს 21 დღისა ბარგის მგზავრისთვის გადაცემიდან.
3. ნებისმიერი სარჩელი ზიანის ანაზღაურების თაობაზე უნდა იქნას შეტანილი ორი წლის განმავლობაში თვითმფრინავის დანიშნულების ადგილზე ჩასვლის თარიღიდან.

მუხლი 13. სხვა დებულებები

1. მგზავრებისა და ბარგის გადაყვანა ასევე რეგულირდება ჩვენი სხვა წესებითა და რეგულაციებით, რომლებიც ეხება უსაფრთხოებას, პუნქტუალობას და მგზავრთა კომფორტს.
2. ამ პირობების რომელიმე დებულების ბათილობა არ იწვევს მთლიანი ხელშეკრულების ბათილობას.
3. ჩვენ უფლება გვაქვს შევცვალოთ ეს პირობები წინასწარი შეტყობინების გარეშე, თუმცა ცვლილებები არ შეეხება უკვე დადასტურებულ ჯავშნებს.